جو کہ گئے وہی ٹھہرا ہمارا فن اسرار
جو کہ نہ پائے نہ جانے وہ چیز کیا ہوتی
اپنی ذات سے عشق ہے سچا باقی سب افسانے ہیں
مدتوں ذہن میں گونجوں گا سوالوں کی طرح
تجھ کو یاد آؤں گا گزرے ہوے سالوں کی طرح
ڈوب جائے گا جو کسی روز خور شید انا
مجھ کو دہراؤ گے محفل میں مثالوں کی طرح
راہ طلب میں کون کسی کا اپنے بھی بے گانے ہیں
چاند سے مکھڑے رشک غزالاں سب جانے پہچانے ہیں
تنہائی سی تنہائی ہے کیسے کہیں کیسے سمجھائیں
چشم و لب و رخسار کی تہ میں روحوں کے ویرانے ہیں
اف یہ تلاش حسن و حقیقت کس جا ٹھہریں جائیں کہاں
صحن چمن میں پھول کھلے ہیں صحرا میں دیوانے ہیں
ہم کو سہارے کیا راس آئیں اپنا سہارا ہیں ہم آپ
خود ہی صحرا خود ہی دیوانے شمع نفس پروانے ہیں
اپنےوجود کی مستی سے ہم رندوں کے احوال نہ پوچھ
قدم قدم پہ چھیڑ خرد سے نفس نفس میخانے ہیں
بالآخر تھک ہار کے یارو ہم نے بھی تسلیم کیا
اپنی ذات سے عشق ہے سچا باقی سب افسانے ہیں
روح پرچھائیں ہے پرچھائیں سے کب پیار ہوا
جسم ہی تو وہ حقیقت ہے کہ دلدار ہوا
کوئی صورت بھی تو اس جیسی نہیں یاد آتی
کیسا لمحہ تھا کہ اک عمر کا آزار ہوا
تجھ سے پہلے تو بہت سادہ و معصوم تھا دل
تجھ سے بچھڑا تو کئی بار گنہگار ہوا
کیا قیامت ہے کہ جس نے مری دنیا لوٹی
وہ بھی اقرار محبت کا طلبگار ہوا
نغمہ صبح تو چھیڑا تھا مگر کیا کیجئے
ساز احساس کا ہر تار شب تار ہوا
قد و گیسو ہی بنے اپنے لئے دار و رسن
کوئی منصور کبھی یوں بھی سر دار ہوا
****************************
چھلکتی آئے کہ اپنی طلب سے بھی کم آئے
ہمارے سامنے ساقی بہ ساغر جَم آئے
فروغ آتش گل ہی چمن کی ٹھنڈک ہے
سلگتی چیختی راتوں کو بھی تو شبنم آئے
بس اک ہم ہی لئے جائیں درس عجز و نیاز
کبھی تو اکڑی ہوئی گردنوں میں بھی خم آئے
جو کارواں میں رہے میر کارواں کے قریب
نہ جانے کیوں وہ پلٹ آئے اور برہم آئے
نگار صبح سے پوچھیں گے شب گزرنے دو
کہ ظلمتوں سے الجھ کر وہ آئ یا ہم آئے
عجیب بات ہے کیچڑ میں لہلہائے کنول
پھٹے پرانے جسموں پہ سج کے ریشم آئے
مسیح کون بنے سارے ہاتھ آلودہ
لہو لہان ہے دھرتی کہاں سے مرہم آئے
***************************
کچھ بھی تو اپنے پاس نہیں جز متاع جاں
اب اس بڑھ کے اور بھی ہے کوئی امتحاں
لکھنے کو لکھ رہے ہیں غضب کی کہانیاں
لیکن نہ لکھ سکے کبھی اپنی ہی داستاں
دل سے دماغ و حلقہء عرفاں سے دار تک
ہم خودکو ڈھونڈتے ہوئے پہنچے کہاں کہاں
اس بے وفا پہ بس نہیں چلتا تو کیا ہوا
اڑتی رہیں گی اپنے گریباں کی دھجیاں
ہم خودہی کرتےرہتےہیں فتنوں کی پرورش
آتی نہیں ہے کوئی بلا ہم پہ ناگہاں !
جنگل میں بھیڑیوں سے سوا کون معتبر
جس کے سپرد کیجئے اقلیم جسم و جاں
...........................................................
لب و رخسار و جبیں سے ملئے
جی نہیں بھرتا کہیں سے ملئے
یوں نہ اس دل کے مکیں سے ملئے
آسماں بن کے زمیں سے ملئے
گھٹ کے رہ جاتی ہے رسوائی تک
کیا کسی پردہ نشیں سے ملئے
جی نہ بہلے رم و آہو سے تو پھر
طائر سدرہ نشیں سے ملئے
بجھ گیا دل تو پھر خرابی ہوگی
پھر کسی شعلہ جبیں سے ملئے
***********************
وہ جس کا سایہ گھنا گھنا ہے
بہت کڑی دھوپ جھیلتا ہے
ابھی تو میرے ہی لب ہلے تھے
مگر یہ کس شخص کی صدا ہے
اگر میں چپ ہوں تو سوچتا ہوں
کوئی تو پوچھے کہ بات کیا ہے
مرے لبوں پر یہ مسکراہٹ
مگر جو سینے میں درد بسا ہے
کوئی شکایت نہیں کسی سے
کہ شوق اپنا بھی نار سا ہے
اسی جگہ کیوں بھٹک رہا ہوں
اگر یہی گھر کا راستہ ہے
ابھی سے کیوں شام ہو رہی ہے
ابھی تو جینے کا حوصلہ ہے
***********************
چاہت کی یہی تو ابتدا ہے
دل میرا جو تجھ سے بھر گیا ہے
ہر شخص ہے جستجو میں اپنی
یاں کون کسی کا آشنا ہے
گزرا ہوا حادثہ بھی یارو
مڑ مڑ کے ادھر ہی دیکھتا ہے
کب تک سئے جائیں گے گریباں
وحشت کی ابھی تو ابتدا ہے
سینے میں چبھن سی ہو رہی ہے
کانٹا کسی کی یاد کا لگا ہے
جو کچھ نہ طلب کرے کسی سے
محبوب وہی ہے دلربا ہے
کیا غم شب غم کی تیرگی کا
دل بجھ کے چراغ ہو گیا ہے
*************************
کچھ تو تعلق کچھ تو لگاؤ
میرے دشمن ہی کہلاؤ
دل سا کھلونا ہاتھ آیا ہے
کھیلو توڑو جی بہلاؤ
کل اغیار میں بیٹھے تھے تم
ہاں ! ہاں ! کوئی بات بناؤ
کون ہے ہم سا چاہنے والا
اتنا بھی اب دل نہ دکھاؤ
حسن تھا جب مستور حیا میں
عشق تھا خون دل کا رچاؤ
حسن بنا جب بہتی گنگا
عشق ہوا کاغذ کی ناؤ !
شب بھر کتنی راتیں گزریں
حضرت دل اب ہوش میں آؤ
**********************
عشق عرفاں کی ابتدا ہے
حسن منزل نہیں راستہ ہے
ذرے ذرے میں سورج ہے پنہاں
تو افق میں کسے ڈھونڈتا ہے
پھول کی زندگی ایک دن کی
نہ جانے کس بات پر پھولتا ہے
جب سے تم مہرباں ہو گئے ہو
دل کو دھڑکا سا اک لگ گیا ہے
علم و حکمت نے وہ گل کھلائے
اب تو وحشت ہی کا آسرا ہے
درد جو مل گیا ہے دوا سے
اس نئے درد کی دوا کیا ہے
کل یہی راستہ بن نہ جائے
آج جو صرف اک نقش پا ہے
***********************
گر وقت کڑی دھوپ ہی بن جائے تو کیا ہو
وہ پھول سا چہرہ بھی جو کمہلائے تو کیا ہو
موج مئے گلرنگ کی لرزش ہے کہ رفتار
اےبادہ وشو یوں جو چھلک جائے تو کیا ہو
ڈسنے کو چڑھی آتی ہے ناگن سی شب تار
صندل سا بدن بھی جو نہ یاد آئے تو کیا ہو
اس بت کی رگ جاں کےقریں بھی تووہی ہے
واعظ کی سمجھ میں جو یہ آجائے تو کیا ہو
انگڑائی ہے یا جام سے ابلی ہوئی صہبا
ایسےمیں جوکوئی پی کےبہک جائےجوکیا ہو
توبہ بھی کروں اور گھٹائیں بھی نہ اٹھیں
پر زلف سیہ ابر سی لہرائے تو کیا ہو
اے ماہ وشو ، گلبدنو ، عشوہ طرازو
تم کو بھی کوئی گر یوں ہی ترسائے تو کیا ہو
******************************
یہی ہے خاک نشینوں کی زندگی کی دلیل
قضا سے دور ہے ذروں کا نکسار جمیل
وہی ہے ساز ابھارے جو ڈوبتی نبضیں !
وہی گیت نفس میں جو ہو سکے تحلیل
دکھائی دی تھی جہاں سے گناہ کی منزل !
وہیں ہوئی تھی دل نا صبور کی تشکیل
سمجھ میں آئے گی تفسیر زندگی کیا خاک
کہ حرف شوق ہے اجمال بے دلی تفصیل
یہ شاہراہ محبت ہے ،آگہی کیسی !
بجھا سکو تو بجھا دو شعور کی قندیل
صدائے نالہ بھی آتی ہے ہمرکاب نسیم
نہ ہو سکی ہے نہ ہوگی بہار کی تکمیل
ہزار زیست ہو پایندہ تر مگر اسرار
اجل نہ ہو تو بنے کون بار غم کا کفیل
جانے کیسی یاد کا پتھر بیتے دنوں سے آیا تھا
شیش محل خوابوں کے سارے پل میں چکنا چور ہوے
آس پڑوس کے لوگ بھی تم کو پہچانیں تو بات بھی ہے
جگ بیتی لکھ لکھ صفی جی یوں تو بہت مشہور ہوئے
