urdu hai jis ka nam

جینے والـے قضـا سے ڈرتے ہیـں

زہــر پـی کر دوا سے ڈرتے ہیـں

دشمنوں کے ستم کا خوف نہیں

دوستوں کی وفــا سے ڈرتے ہیں
***************************
جس قدر دل بسمل ناز و ادا بنتا گیا
باعثِ دلچسپی اہلِ وفا بنتا گیا

زندگی ممنونِ احسان ہی وہی ان کے حضور
لب تک آ آ کر ہر اک نالہ دُعا بنتا گیا

ایک مرکز پر رہی قائم یہ بزم کائنات

نقشِ ہستی اک مٹا اور دوسرا بنتا گیا

میں نے چھیڑا تھا کبھی سازِ شعور زندگی
جب سے ہر نغمہ میرے دل کی صدا بنتا گیا

بے سہارا دیکھ کر کشتی خدا پر چھوڑ دی
اور میں اپنی نظر میں ناخدا بنتا گیا

****************************

آدمی اتنا بھی نہ دور ہو زمانے سے
صبح کو جدا سمجھے شام کے فسانے سے

دیکھ طفلک ناداں قدر کر بزرگوں کی
گتھیاں نہ سلجھیں گی مضحکہ اُڑانے سے

زخمِ سر کے دیوانے زخمِ دل کا قائل ہو
زندگی سنورتی ہے دل پہ چوٹ کھانے سے

مطرب جنوں ساماں تو نہ چھیڑ یہ نغمہ
دھن خراب ہوتی ہے تیرے گنگنانے سے

گرمئی سخن سے کچھ کام بن نہیں سکتا
مل ہی جائے گی منزل دو قدم بڑھانے سے
*******************************
کہیں عشق کا تقاضا کہیں حسن کے اشارے
نہ بچا سکے گے دامن غم زندگی کے مارے

شبِ غم کی تیرگی میں میری آہ کے شرارے
کبھی بن گئے ہیں آنسو کبھی بن گئے ہیں تارے

نہ خلش رہی وہ مجھ میں نہ کشش رہی وہ تجھ میں
جسے زعمِ عاشقی ہو وہی اب تجھے پکارے

جنہیں ہو سکا نہ حاصل کبھی کیف قرب منزل
وہی دو قدم ہیں مجھ کو تیری جستجو سے پیارے

میں شکیل ان کا ہو کر بھی نہ پا سکا ہوں ان کو
میری طرح زندگی میں کوئی جیت کر نہ ہارے

******************************
متاع غم عاشقی مانگ لوں گا
تمہی سے تمہاری خوشی مانگ لوں گا

دم نزع بالیں پہ آئے جو کوئی
خدا سے نئی زندگی مانگ لوں گا

شبِ غم چھپا ماہِ کامل تو کیا غم
ستاروں سے کچھ روشنی مانگ لوں گا

تمہی اک نہیں حسن والے ہیں لاکھوں
کسی چاند سے چاندنی مانگ لوں گا

جواز خود نہ بدلا نظامِ دو عالم
تیری زُلف سے برہمی مانگ لوں گا
***************************
بدلے بدلے میرے غم خوار نظر آتے ہیں
مرحلے عشق کے دشوار نظر آتے ہیں

کشتی غیرتِ احساس سلامت یا رب
آج طوفان کے آثار نظر آتے ہیں

انقلاب آیا نہ جانے یہ چمن میں کیسا
غنچہ و گُل مجھے تلوار نظر آتے ہیں

جن کی آنکھوں سے چھلکتا تھا کبھی رنگِ خلوص
ان دنوں مائل تکرار نظر آتے ہیں

جو سنا کرتے تھے ہنس ہنس کے کبھی نغمہ شوق
اب میری شکل سے بیزار نظر آتے ہیں

ان کے آگے جو جھکی رہتی ہیں نظریں اپنی
اس لیے ہم ہی خطا وار نظر آتے ہیں

دشمن خوئے وفا رسم محبت کے حریف
وہی کیا اور بھی دو چار نظر آتے ہیں

جنسِ نایابِ محبت کی خدا خیر کرے
بو الہوس اس کے خریدار نظر آتے ہیں

وقت کے پوجنے والے ہیں پجاری ان کے
کوئی مطلب ہو تو غم خوار نظر آتے ہیں

جائزہ دل کا اگر لو تو وفا سے خالی
شکل دیکھو تو نمک خوار نظر آتے ہیں

روزِ روشن میں اگر ان کو دکھاؤ تارے
وہ یہ کہہ دے گے کہ درکار نظر آتے ہیں

ہم نہ بدلے تھے نہ بدلے ہیں نہ بدلیں گے شکیل
ایک ہی رنگ میں ہر بار نظر آتے ہیں
*****************************
شوخ نظروں میں جو شامل برہمی ہو جائے گی
اور بھی جنس محبت قیمتی ہو جائے گی

آنکھوں آنکھوں میں جو صلح باہمی ہو جائے گی
بات بھی رہ جائے گی اور بات بھی ہو جائے گی

دل نظر بن جائے گا غم ہر خوشی ہو جائے گی
آپ کے جاتے ہی دنیا دوسری ہو جائے گی

آئینہ کر دے گی میری خود فراموشی مجھے
بے خودی جب حد سے گزرے گی خودی ہو جائے گی

داغ دل بن جائے گا فرقت میں رشک مہر وفا
یوں بھی میرے غم کدے میں روشنی ہو جائے گی
*********************************
یہ تمام غنچہ و گل میں ہنسوں تو مسکرائیں !
کبھی یک بیک جو رو دوں تو ستارے ٹوٹ جائیں

میرے داغ دل کی تابش جو کبھی یہ دیکھ پائیں
وہیں رشک بے اماں سے مہہ و مہر ڈوب جائیں !

کبھی ذوقِ جستجو پر اگر اعتبار کر لوں !
سرِ راہ منزلیں خود مجھے ڈھونڈنے کو آئیں !

کبھی بے قرار ہو کر جو میں سازِ عشق چھیڑوں
تو یہ مشتری و زہرہ کوئی گیت پھر نہ گائیں !

میرا ذوق مے پرستی ہے کچھ اس قدر مکمل
جو میں جامِ مے اٹھا لوں تو برس پڑیں گھٹائیں !

سرِ مے کدہ جو دیکھیں میری کشی کا منظر !
ہوں شیوخ سر بہ سجدہ ، کرے زاہد التجائیں
******************************
ناکام عرض شوق کی جرات ہے کیا کروں
دل خود ہی پردہ دار محبت ہے کیا کروں

شوق طواف کوئے محبت ہے کیا کروں
ان کی گردشوں پہ اور یہ حسرت ہے کیا کروں

دل کا بھی کیا قصور تمھاری بھی کیا خطا
بر گشتہ مجھ سے خود میری قسمت ہے کیا کروں

تم ہوں جفا پسند تو میں ہوں وفا شعار
خود دار اپنی طبیعت ہے کیا کروں

دیکھوں انہیں تو تاب نظارہ نہیں مگر
ان کو نہ دیکھنا بھی قیامت ہے کیا کروں

تقدیر ہی سے صرف شکایت نہیں ہے مجھے
تقدیر کو بھی مجھ سے شکایت ہے کیا کروں

گو دل شکن ہے ان کی تغافل شعاریاں
اس پر بھی مجھ کو ان سے محبت ہے کیا کروں

جاتا ہوں روز ان کی طرف دل بکف شکیل
کمبخت آج تک وہی عادت ہے کیا کروں
****************************

اے قافلئہ شوق میرے دل سے گزر جا
منزل کی تمنا لیے منزل سے گزر جا

پروردئہ طوفاں ہے تو اے موج محبت
ساحل بھی جو آ جائے تو ساحل سے گزر جا

پھر دیکھ جو ہو کشمکش حسن کا عالم
نیچی کیے نظروں کو مقابل سے گزر جا

دل ڈھونڈ رہا ہے کوئی جاں سوز تجلی
اے برق نظر سینئہ بسمل سے گزر جا

ہر گوشئہ ہستی ہے ابھی درخور تعمیر
اک بار اجڑی ہوئی بستی سے گزر جا

*************************

مست نظارہ بھی کس درجہ تجاہل کوش ہے
یوں نظر آتا ہے جیسے واقعی بے ہوش ہے

خوف فردا ہے نہ فکر ہائے دوش ہے
اب تصور میں تیرا آغوش ہی آغوش ہے

رفتہ رفتہ بجھتا جاتا ہے چراغ آرزو
پہلے دل خاموش تھا اب زندگی خاموش ہے

کوئی دیکھے تو ذرا اعجاز حسن بے اماں
رو برو کا رو برو، روپوش کا روپوش ہے

جو بھی دل ہے عشق کی نیرنگوں پر ہے نثار
عشق کا آغوش بھی کیا حسن آغوش ہے

مجھ کو طوفان حوادث کی نہیں پرواہ شکیل
میری ہستی ابتداء ہی سے تلاطم کوش ہے

****************************